منتديات بغداد دار السلام الاجمل والاحلى
اهلا وسهلا بك عزيزي الزائر الكريم انت الان داخل منتديات بغداد دار السلام ندعوك للانظمام الينا والتسجيل معنا كي تستطيع التصفح بحرية وتتمتع بكافة الصلاحيات مع تحيــــــــــــــات ادارة المنتدى

منتديات بغداد دار السلام الاجمل والاحلى



 
الرئيسيةالبوابةمكتبة الصورس .و .جالتسجيلدخول

 | 
 

 الف دارمي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
المدير العام
المدير العام


ذكر
عدد الرسائل: 713
الموقع: على الارض
تاريخ التسجيل: 03/11/2008

مُساهمةموضوع: الف دارمي   السبت أبريل 24, 2010 12:02 am

يابة هاي الف درامي اهداء للمنتدى شبعو دارميات تريكو وتعشو بيهم هاهاهاهاهاها تحياتي حسين لطيف

انت بوسط هل روح لاتظن اعوفك ادفع عشر ورقات بس كون أشوفك • غالي و عزيز هواي و اغله من العيون من كثر نوحي عليك ماظل الي عيون • دك روحه ست دكات و نكلب هزاز جوالي هم شيطان يعرفهم اعزاز • حبك سكن بالروح فلشني تفليش لا تخسر السنتات جاوبني ترميش • لو امشى عشر سنين امشيها واكثر ما اتعب وما اجوز من حب الاسمر • صابر اضل للموت بس كون اشوفك تدري انت كلش زين مابية اعوفك • انته الصبر وياك مثل الحلاوه من كثر ما بالروح عندك غلاوه • هم شفت واحد ناح من كلشي مابي من كثر ظيم البي مايعرف اشبي • من كلشي اغار عليك ويغثني كلشي كسر بجمع ماريد وي غيري تحجي • ساكن تظل بالروح ولاتظن ناسيك انت البديت الطيب وشلون اجازيك • بالحلم جنك جيت من ذاك الغياب كبل ايدي شفت الروح فتحتلك الباب • سوبر يسوق هواي وسويجه ذهبي غالي وكراجه الروح والساحه قلبي • من البصره ليبغداد لفرش زوالي خافن تدوس الكاع رجلك يغالي • صافن وعد ايام و ايدي على خدي هم سجن هم سجان هم وكتي ضدي • خنتي العهد وياي كل عذر ماريد عمري انكضه وياج بس المواعيد • ياعيني يابغداد باكو فرحتج يفرجهه رب الكون وترجع ضحكتج • مقصر تراني وياك وشلون اوافيك لو بيدي اشيل الروح وانته الاخليك • ملهوفة هاية الروح محرومة يهواي تاركها تعطيش ليش وبشفتك الماي • لو تدري بيه شصار من فاركتني جن العراق أنشال كله على متني • زين انته ثلث سهام طبن بگلبك گلبي انترس طعنات واصرخ احبك • بالحلم جنك جيت جن عايدتني بستك ثلث مرات شو ما بستني • الروح شوگ تزيد بس هوه وينه جوه الارض مدفون يختي الحنينه • لا تندم على الراح شد حزمك ردود ولا تظن علطيبين باب الله مسدود • ليش ابهجر وبظيم خلصن ايامي وحتى الحلم وياي عاكس مرامي • حبك يبعد الروح سوالي ورطة شفت البقر يهواي حسبالي بطة • لا عقد لا تعيين لا اجر يومي ارحمني يالدستور ركدن هدومي • خوان نبقى العمر وبعمري كله افديك انته العزيز الوفي صدكني ما ناسيك • فهمني يالمحبوب موقف حضرتك بالكلب كاعد ليش قابل غرفتك • باب الكلب مفتوح مارايد اجفاك يكفي اسم حجام يجمعني وياك • عامر يبن حجام ليش التجافي هاذا انا ابن حجام للكل يوافي • هاك الكَلب والروح هاك اخذ العيون واخذ العقل وياك خليني مجنون • وين اليخيط العين ويفكني منها كل ماتصد للدار يكثر حزنها • اسالت روحك ليش من عاتبيتك كاعد جنت علجات بس مالكيتك • اتمنى اصير عيون وبجي اعله خدك تدريني اموت عليك كلشي ولا بعدك • ارد انشد العقال واهل العداله لو نشف ملح الزاد شنحط بداله • لو مصخ ملح الزاد حط ماي العيون فنهم بعد يا صقر ماصخ يكولون • للصاحب امشي بالليل للخوه ممنون لو نشف دمع العين ابجيله العيون • للاخو اهدي الروح واهدي العشيره واهدي الكًلب والعين للعنده غيره • جمر وثلج فد كاس ينجمعن شلون الجمر لون شفاك والثلج السنون • شحجي وشكول عليك عذبت حالي اتلاوه ويه الموت وانته على بالي • عوف الولف ياصاح وبالك تداري لوتنطي ماي العين تشبع بواري • بالجنه لو طبيت والحور اجني اصرخ اريد هواي شلي بهذني • الغربه ما تنراد بس والله مجبور شايف عدل يختار يسكن بالكًبور • شيمه ومحبه وطيب كل الفخر بيك لو تطلب انت الروح صدكني انطيك • اغفه وتفز العين مشتاكه ملكاك وتصب الدمع بسكوت ما ترضه تنساك • اتمنه كلبي يطير ويصير يمك ويحضنك حضنة شوك حيل ويشمك • فز وانقسم نصين كلبي اعله طاريك كم نص تظن ايصير لمن يلاكيك • صدكني ماحبيت بس انت حبي جوه الضلع موجود يعني انت كلبي • كــــل البشر دولار بــس انت دفتر بكلبي حضر تجــــوال بس انت تفــتر • أشكيلك من الشوك كاضيني كضيان ومن كثر نوحي عليك شالو الجيران • عطشانه روحي عليك يلشوفتك ماي تقبل اضل عطشان يلمارد حشاي • هي : وينك يابعد الروح ما تكلي وينك مو تدري صار اسبوع ما سامعينك • هو : ادري انه صار اسبوع ماسمعتي صوتي مرت عليه ايام شفت انه موتي • هي : سالم يابعد الروح انت وحياتك والله انه اموت الروح لو جت مماتك • هو: روحي ويا روحج دوم مشدودة فد شد وحبج سكن بحشاي واتعده كل حد • هي : محد سكن بالروح بس انت وحدك لو تدري صار اسبوع موتني بعدك • هو : ما ابعد وما روح ما اريد اعوفج لن عيني عميه تصير لو ما اشوفج • هي : شما تروح بعيد ابقى انه اريدك والكلب يامحبوب سلمته بيدك • هو : كلبج كبير هواي يسلملي كلبج ومهما يصير بعاد ابقى انه احبج • من فركتج لليوم ماشفت الافراح ولاضحك سني بيوم ولاكلبي ارتاح • ابجي وتكلي الناس جرحت الاخدود كافي البجي ميفيد ولفك فله ايعود • احسب وعد ساعات سالفتي بس بيك واتمنى اشبگك حيل وبروحي أخليك • سالفتي شنهي وياك صارت طويله وعيب احتمل فرگاك مابيدي حيله • اشگد حاولت انساك بس ما نسيتك سويته كلبي اثنين بلنص لگيتك • اشرب حزن وهموم ما اشرب الماي وانفطم من الزاد بس كونك وياي • كل هذا ماخليت شامت يمر بيك الا بطلب يهواي كلمن يحاچيك • لو انتي لو ماريد غير الاحبهه وبقه انتظر للموت ساكن دربهه • نص روحي خذها وياك لاوالله كلها فدوة الك هالــروح هيه واهلهــــا • عاشرت كل الناس بس مو مثلكم كلساع احس بالموت لو ما شفتكم • بكل ساعه احن عليك لا كل دقيقه وجهك كمر و ينور ويدك رقيقه • هجرك يماي العين عذبلي روحي و من الألم و الضيم صاحت جروحي صاحت جروحي اليوم رايد اشوفك لا تظن أبد فد يوم والله اني اعوفك • روحي التود ملگاگ كولي شگلها موبيدي اعوف الجات ولااترك عسلها • جيتك غفل يهواي تضحك لكيتك حسبالي تحزن دوم من فاركيتك • هم حلو هم زغير هم ازرك عيون بس بي طبع مو زين من يوعد يخون • سبحان من سواك نص وجهك عيون صغير سبيت الناس من تكبر شلون • عمدا امر بالدار والنوح ازيده واسمع صداها يكول راح التريده • رحت انه للدكتور شاورني بسكوت لو ولفك يداويك لو باجر تموت • خدك حجر فيروز والنحر من ماس جا الله من سواك ما فكر بعد ناس • تمثال الك بالعين شايلته الجفون نافورة منة وبيه دمعات العيون • بس بعد لا تطريه هم الجفة وراح لو عادة صارت بيك بس تحوي الجراح • شبيدي على اللي راح وشلون ارجعه ومن بعده مابقيت بالعين دمعه • جنت احبك جنت اهواك واتمنى اشوفك وهسه لو بس انته تصير هم انه اعوفك • لو همي جان جبال اتفتت وراح لكني عكب الراح مااكدر ارتاح • الدنيا ليش وياي نصبت عداوه وماشفت منها غير بس القساوه • لو تدري كلبي اشلون لجلك حمل هم جا كلبك ابهل ساع طك ونزف دم • انه مشتاقه لاحبابي وارضي بلقاهم ولو تخرب الدنيه ابقي وراهم • هم تدري هم وهموم من ما اشوفك شرطي وتحامي الناس عاذر ظروفك • كلبي شكثر يهواك ويحبك انته ولو كلبي حب اثنين هم انته و انته • التمّن اعلى هواك ... اتلاثه وثنين هم وحزن وافراك ... والغربه والدينَ • كسر العظام ايهون يتشافه ويروح حيرت اليجبرون لن كسري بالروح • وين انته واتعنالك حته لجهنم مو دمع تبجي العين حمره وتصب دم • اخسر حياتي وياك لا والله مهتم العيشه بس وياك تحله بجهنم • خوه ونظل للدوم سنه ويه شيعه والدين نفس الدين نفس الشريعه • مو بيدي من حبيت بس الله يدري من زغري حب هواي بالگلب يسري • شاب وشبت والشيب مالايج وياي كل طگج على الراس بسج يدنياي • احا يخوتي الشيب غط هدب العيون وما اوجد الشمات من اليحبون • هاي اذني يابو فلان انچان افك حلگي وباب الكلب مفتوح هم احط سرگي • هذا الحچي التحچي قنعة لروحك اصبر شهر شهرين واحسب اجروحك • كون الله واهل البيت وحق الصحابه يرجع حبيب الروح ويذكر احبابه • كون الخميس يشيل منك يالسبوع بيه زفة المحبوب وتهل الدموع • بالسبحه خيرة خذت لحبك گلت ماعود الخيط ذب الخرز ونكسر كل شاهود • ما همني الكصاب من كص وريدي همني الصديق الخان وظنيته ايدي • مر بينه شنهو يصير من تمر خايب مسموم انا بفركاك مامش حبايب • طير انته وانا الكاع لازم تحط يوم لوطاير وتعبان لو صايدك حوم • اتمنه لو رسام ورسملك اعيون وسع البحر واحتار اصبغهه يالون • حسدوني ولهاليوم ماشيب الراس شيبي الطلع بلروح ماشافتة الناس • بلحلم جنك جيت من ذاك الغياب كبل ايدي شفت الروح فتحتلك الباب • اتمنه لو رسام كل نظره لوحه وبعينك انسه الروح من ينسه روحه • يال ما دريـت اشــصار اوقـف واكـلك حـال اليـتـيـم تهـون عـن حـال خـلك • خـاف اللـه يالمريت ما كـلـمـتـنـي لـيـتك حكيت اوياي لو شـتـمـتـنـي • قـلـبـي عـلـيـك يـنـوح مانام لـيـلـه مسألتي انا وياك صارت طـويـلـه • جيتك بقايا انسان ايدي على خدي قـلـبـك صخـر مالان يالعـفت ودي • ترجع تـرد الـروح ياكامل الـزيـن انا ارد امـوت اليوم وتقلي بعدين • لا يا وليف الـروح لا تنســـــى ودي مالي غرض بالناس بس انته عندي • الما يـنـام اللـيـل عـلـه عـلى عـله العـيشـه عـقـب اهواي عيشة مذله • يـا خـلـي لا مـريـت ســلـم عـلــيـه كـل الـسـبـب ذولاك انا اش بـيـديه • يـاخلي لـو صـديـت قـلـبي يريـدك مـوت وحـيات الـروح ياخلي بيدك • ياسمر فراقك ليش روحي جرحها صابر ودمع العين غصبن فضحها • شلونك شلون الدار وشلون الاحباب اذكر جرح بجلاك بشرني ما طاب • علمني عانسيان ارد انسه ضيمك وي غيري كمره تصير بس حصتي ضيمك • همك وخم الناس وهم هم الهموم لو وحده منهن بيك ماتكدر تكوم • يا عازه الخوان عازتها عازه والماوراها صياح وحشه الجنازه • مبخوت اظل للشيب يافلان اذكرك وينكرني نور العين كون من انكرك • متعجب المهموم يشرب جكاره قلبي بكثر مانوح تجويني ناره • اكعد بتال الليل وادعي بصلاتي ياربي بعد فلان شلي بحياتي • يسالني البطران حالك اشلونه الغاضب الله عليه هم ينشدونه • مشتاك الك والشوك جنني يهواي موانه احبك ليش تتعاند وياي • معذوره روحي تموت ماتحمل افراك اشتاك الك كل يوم هم مثلي تشتاك • احجي اعله شوك الروح لوخلهه سكته بالدنيه احب اثنين بس الله وانت • صبري وصبر ايوب ما ضن سوييه لو يدري بيه ايوب هم يبجي عليه • کون الگلب بي باب وانتو اقفاله واجعلکم اعله الباب واگعد اگباله • نايم وافکر بيک من اگعد اکثر ابحبک صرت معتاد بس الله يستر • اتمنه لو بالطيف هم تمر بيه نتشابگ انه و ياک ونفز سويه • ليش انتة هيج وياي كاظيهة تجرح مرة بجذب يهواي خليني افرح • الكلب لوينساك للسوك اجيبه واكتب عليه للبيع خاين حبيبه • أنهجم بيته الليل هاطوله بجفاك وبطول أظفري أيصير من أكعد وياك • ماناسي والينساك ماعنده خوة بس الوكت مرات يلهينه كوة • عمري الخلص زينات صرت انا شينه حته النحبه اليوم يضحـك عليـنه • الكًلب بجفاك فاض من العيون مو حب طبيعي اهواك بيك انه مجنون • فراش وغطة وماعون تلكانه لو جيت احنة الظيوف نصير ونسلمك البيت • من كثر حزني اعليك دمعي اصبح اسود حفر سواجي اثنين من نزل علخد • مالي گلوب اثنين خو تدري بيه واحد واخذته وياك وشـظل اليه • ما خايف من الموت ... وايام الحساب كل خوفي دفني يصير.. بيدين الاغراب • من عيني اطلع الماي واكتب على الروح جمل بطاقة عيد لعيونك تروح • اسال عليکم دوم کل فکري يمکم هذا الزمن غدار باعدني عنکم • اثول حبيب الروح وعيونة ليلو بس للاسف يا حيف الشامة كيلو • هم همك وهم الناس وهم هم الايام ولا عيني ترضى تهيد ولا تقبل تنام • ناسينة وناسي الناس بس ما نسيتك هلبت تمر فد يوم من انهجم بيتك • انشدني عالحال حالي أعلى حـــــاله سمجه أوشحيح الماي وبظهري فاله • حسـره إلك بالدلال ظـلـت لما أموت ماتدري حقها الناس إصوابي بسكوت • يالردت عني اتروح خليلي صبرين واحد يصبر الروح والثاني للعـــين • شامت وكًف عل الباب حاير شـــــكًـلـه أرتجي إعله المكســــور لو دمعي إهله • إرتجي إعله المكسـور حيل إردس الكًاع بالك تذل جدام شماتك إبســــــــــــــــــاع • ارد انصحك يافلان هذي النصيحه عوف اتلف وادور حب الصريحه • احمل وفى والطيب والرقه كلــــــها أوكل مشكله ابهالكون بس يمه حلها • ريته اليطيح ابضيج كون اخوه وياه اوكل مايقول احاه كلها اتلــــــــــقاه • خـاف اللـه يالمريت ما كـلـمـتـنـي لـيـتك حجيت اوياي لو شـتـمـتـنـي • قـلـبـي عـلـيـك يـنـوح مانام لـيـلـه مسألتي انا وياك صارت طـويـلـه • جيتك بقايا انسان ايدي على خدي قـلـبـك صخـر مالان يالعـفت ودي • ترجع تـرد الـروح ياكامل الـزيـن انا ارد امـوت اليوم وتقلي بعدين • يوم انا اخـس من يوم لـو كان تدري هذي ثلاث اشــهور منته عـلخـبـري • لا يا وليف الـروح لا تنســـــى ودي مالي غرض بالناس بس انته عندي • الما يـنـام اللـيـل عـلـه عـلى عـله العـيشـه عـقـب اهواي عيشة مذله • يـا خـلـي لا مـريـت ســلـم عـلــيـه كـل الـسـبـب ذولاك انا اش بـيـديه • يـاخلي لـو صـديـت قـلـبي يريـدك مـوت وحـيات الـروح ياخلي بيدك • ياسمر فراقك ليش روحي جرحها صابر ودمع العين غصبن فضحها • أطحن واكضي الليل عن المأ ريده بالكذله أصبح شيب من مدة ايده • موش أطحن شعيرات أطحن بهمك أكعد ودور الروح تلكاهه يمك • ما تنسمع رحّاي بس بجيّ مسموع جاتلني والله هواي ما منه مرجوع • متحزمه وانكل شوك (للفود)أدفيه بخشيش ألك يالموت؟من عندي دخفيه • ضيجة خلك بالبيت رجلي آنه اشوفه صاحت علىّ الناس جن أرد اعوفه • زفوني نص الليل للبرد حيله... حبني وترسني اتفال من وره الشيله • الحجي بس وياي ناكص بالعيار كلهن يكسرن جوز وآنه أكسر حجار • كل الشيوب التموت شيبه يتجدد رآيه وسبع خرفان يوم يتمدد • يا فلان اجاك وليد حظك غلبني اوصل لباب الدار يبجي ويردني • جيبولي جدر النيل خل اصبغ الثوب تو أيس الدلال منهم فرد نوب • مو كلشي نتمناه يوكع بدينه أحنه السفن والريح تلعب علينه. • آي والعرش واللوح والبلعته الحوت نارك بلب أحشاي تلتهب للموت • والحجر وأهل البيت والحج والحرام كل ساعه من فركاك(يشكر )بالف عام • غصبن عله الروح جابتني اشوفك جثر الهه بالصدعات بلجن تعوفك • وشبعد وشخليت تنغط يالغراب تنذجر ماتنشاف خليت الاحباب . • كالولي منهو ذاك كلتلهم هواي شنهو العلامه البيه.؟رف كلبي وجلاي • ما نمت ربع الليل نشدوا ألمخده وآنه حلمت بهواي خدي عله خده • أحزن حزن معدان وارجي العصابه ويه أم رجل وفروخ عوجه الطلابه • أتنخه بالنسوان خيه أبجن أبجن نوبه عله ولفي الراح نوبه عله هلجن. • أرد اللعب بدنايّ ما طالت ايدي الفكر والشبعان خامه أبمجيدي • همي وهم هواي وهم الله فوكه تفتر عليه الناس جن عندي بوكه • كومن يل محبات لمن غراضي بفراكي وية هواي جن الله راضي • يهل الجرف ماشين مسلم عليكم الميت الله وياه والحي يجيكم • يا دار المحبين بكشة ارد اسويج لو مايلوحج ماي من دموعي اسكيج • ريت الكلب ياهواي ينطر وراويك جا كلت عفيه عليك دم ولحم بيك • ريت الكلب بي باب ينطر تشوفه ولو شفت غيرك بيه حك من تعوفه • كلبي ارد اكصه أبموس واتلاحكه بنار خافن يحن ويكول للعشره تذكار • بس جرح بالدلال ينزف فلا طاب خله يظل تذكار لملاكه الاحباب • من كلبي خذلك نار جمل جهنم والما يعرف ينوح مني يتعلم • صح وصدك عطاب تشتم الخشوم من كلبي تطلع نار موش من الهدوم • آنا لك يالدلال أفرغ وجويك لسه تحن لساه لا مروا عليك • الدنيه ضاجت وضاج بعيوني الزمان ومن ذكرتك صار بكليبي المجان • كلبي من أمس واليوم مالي أهد بيه مدري انشد الجيران لو صوت عليه • حيل أفرح أبملكاك يل مكبلك عيد وصار الكلب بجفاك تنور اجاويد • يمته الأحبها اليوم تتلاكه وياي أخبرها كلبي يذوب وبطرة جلاي • حس كلبي حس ونحاس ونصدع ونعاب آس ولك أسمع صوت بديار الاحباب • أيد ارتجي عل كاع ويد بدليلي أنهض مابياش وكفه عل حيلي • مر الدهر لا صار اصبر وباريه بلشت كلبي وياه وأدريبه ياذيه • حسره لك بالدلال ظلت لماموت مادرت حكها الناس أصوابي بسكوت •لو نهر من تيزاب شارعكم العام اتعنة الك سابوح خل اوصل اعظام •عيد واجاني العيد وانتم بعيدين تبجي وتريد احباب مجبوره هالعين •فدوة الك كل الراح والباقي فدوة غالي واشوفك دوم بعيوني قـــدوة •جربتك اني هواي كل رجـوة مابيك ولساني اكصة انوب لو هم يحاجيك •تدري شكثر يهواك كلبي ويحن ليك وذاك انته دوم وياي حنية مابيك •خل نكعد اني وياك ياهو اكثر هموم همي بكثر دنياي و الباقي مضموم •لابيك جيه وتجي ولا بيه حيل انساك ظلينه بس بالحلم نتلاكه انه وياك •عيون العراق أعيون من أحلى العيون فن وأصاله وخير عدنـــــا تلكَون •انهجم بيت الليل هاطوله بجفاك شو يمر مثل الطيف من اكعد وياك •صح انته عني بعيد من تحسب امتار بس انته وسط الروح مبنيه الك دار •كلما تعذب الروح ارضه انه يهواي بلحشر بلكي يطول موكافك وياي الخوه منبع طيب وانته من اهلهه وليزرع الطيبات يحصدمثلهه •سنن سيوفه وياي دهري وذبحني وفوك الذبح والضيم ولفي هجرني •فوك الهجر فوكالظيم هم ظالم وقاسي وسهمك وصل لحشاي يا اعز ناسي •كلمن يحب ينگال حب وتمرمر گلبة انجرح جرحين مو مية اكثر •ربيته ردته يصير لجروحي بلسم لمن كبرت وصار جرثومة بالدم •أرد اسأل العراف واهل القوافـي ليش الحجاب إيلوق للوجه صافي •بالروح أسلم عليك مو بالاشارة وأنتي يا بنت الناس سويلي جار •الكلب لملم غيم بيه اسمع ارعيد تسعر وما تطقاش نارك يلبعيد •دنية ومدار يدور ومكالب افلاك بأمرالله نوبة يشيل هذا ويحط ذاك •حسبالي تبچي دم من فارگيتك جيتك غفل يهواي تضحك لگيتك •العتب لو بي خير چنت أعتب هواي واليعتب على هواه ظل تايه الراي •كل وكتي افكر بيك صبح ومسية تالي انت وي شمات تحجي عليه •ظلمة وتلمم غيم واشتد مطرها روحي اشتهت ملكاك من فلك طرها •احول حبيب الروح اثول مطفي لاگاني عين بعين باس البصفي •اكتب جوابي عليك معروفه الاسباب لو صرنه متحدين جرح الوطن طاب •سن الضحك وياك لازم اشلعه كلبي الرف عليك من صدري اطلعة •ما ظل فلس بالجيب واتصل بيكم ولا فرس يم الباب واركب وجيكم •ثلثين اللك بالكلب ومن الثلث ثلثين وباقيلي بس الثلث هم بيه الك ثلثين •حطيتك بسرداب فوكة متر صب اصبح الواشي وياك من ياكتر طب •لاتهتم على الراح وي همك الراح والعالي مو بالطول بالصبر ينلاح •كون الكلب بيه رام مانمت مجروح حتى أفتح أبلوتوث وارسلك الروح •صافن واعد نجوم وايدي على خدي هم حزن هم فراك هم انته ضدي •ياگمر تالي الليل شوفنة الاخبار نايم حبيب الروح لو مثلي محتار •لو تدري بيها الروح هامت بلياك ميت .. جسد ظليت يحيني ملكَاك •غيره وكرم واخلاص كلهن صفاتك واتعب شوصف بيك يالطيبه ذاتك • كالو يجيله المحب كلمن ترف عينه رف كلبي ويه الجفن بس المحب وينه • كل ما أريد أنساك بسمك يصيحون يتحرك الدلال وتهل العيون • بالحلم شفتك طيف كحلت العيون نايم وأفكر بيك من أكعد أشلون • گلبي ارد اكصه ابموس واكطع وريده يبجي عله بنت الناس شنهو اليريده • مو تاجر انه احزان تاجر محبه والكلب لو ينساك والكعبه اذبه • هاچ الگلب اخذيه دفتر للدروس وعيوني من تقرين سويها فانوس • لا تظن يوم انساك وانسة الجرالي جثة انه بالتابوت وانته على بالي • بك عذبلي الروح وتاليها وياك لا بيه اعوف الروح و لا اكدر انساك • صدكني ابيع الروح بس كون اشوفك صرت انت ماي العين وتريد اعوفك • اعزك اكثر من الروح والروح الك افديها احبك واليحب مجنون كلي شلون تاليها • صح انة حايط طين ساسة بوسط ماي ومثلم وماطيح ومدوخ اعداي • لا تشل ببرة وخيط شله گلبي بسيم خافن رجيج الخيط ويكطعه الضيم • سير والك تقدير غير اليسيرون شمسية تبره وياك رموش العيون • ارد اسال العشاك ليش انه مشتاك نايم بحضن هواي واشكي من الفراك • صاير طبع بهواي مايشبع من العين ماخذ عشر بوسات و3 بالدين • لازم نصل للدار وندك على الباب ونبجي بدمع همال على كل الاحباب • انة بغزير الماي روحي ارد اذبها ويتبين الكراه من اليحبها • للحادي صحت بصوت وبعال صوتي ياوسفة طحت بضيج وبين اخوتي • شكثر ذلتنة الليالي ماظن مرة اشتكيت بس على فراكك ياغالي دنكت راسي وبجيت • رش الدرب تيزاب حافي اعتنيلك جا شلي بالرجلين الما تجيلك • لو مو ترش تيزاب لو تزرع الغام خلي اللحم طشار واوصلك اعظام • خليه يرش تيزاب طشـــار الحكَــــــــه وحتى إمن أشـــوف ألغام عمدا أسحكَـــه • اهواي افكر بيك تجبرني روحي • ريت الافكر بيه يداوي جروحي • الجواب: زين انت عندك روح واجروحك تروح من عرفتك لليوم ما عندي غير النوح • ارد اسال القانون واهل السياسه.. شي زعل المحبوب لوولفه باسه.. • الرد مو بوسه اخذ اثنين والثالثه اتهون طبع الحب يهواي من يرجع يخون • حط عينك عله الدار يل تظل بيها بلجي الزمان يعود ونرد ليها • امشونة للديران نعلك ضوه الها بلكت جميل نصير النة على اهلها • كومن يل محبات لمن غراضي بفراكي وية هواي جن الله راضي • يهل الجرف ماشين مسلم عليكم الميت الله وياه والحي يجيكم • كسرالعظام ايهون يتشافه ويروح حيرت اليجبرون لن كسري با لروح! • الرد زين الكسر بالروح تندل مجانه بس كسري وين ايصير ماأعرف أنه • الرد تسألني عن الروح يسهل كسرهه من تنكسر بالحال يخلص عمرهه! • يا خالج الاكوان والنجم وسهيل ليش الكلب والروح من شوفتة يسيل • مد ايدك على الجلاي جس حالي طيبة ردتك تشد الراس مثل الحبيبة • احا يخوت الشيب غط هدب العيون ماوجد الشمات من اليحبون • الرد متعجب انت الشيب غط هدب العيون انة الملاني الشيب من تحت السنون • اشكيلك مضيجات خلكلي اليالي باليل افز مرعوب وابجي على حالي • كلي شيفيده الماي للحركتة النار لو جايز من هواه كل هذا ماصار • هم انت مثل العين مكدرلج انهاج شو كلج تفزين من يكبل هواج • الدنيا لزنكين تركصلة جوبي وانة الفكر ياناس شكالي ثوبي • هذا الوكت مخشوش ياصاحب الراي الزرع بيش يعيش لو فارك الماي • الدهر لو وازاك هم انت وازه سل سيفك بيمناك واطلب برازه • لعبت الدنيا وياي لعب المجانين تطلعني من سيان وذبني بالطين • الدنيا للتهواه توكفلة وكفه ويظل رشيد الراي محد يعرفه • الدنيا للتهواه ترخيلة الحبال تنزل الطيبة عليه وتغير الحال • الدنيا للتهواه تركصلة ركصة والماتريدة ينوح لو خلص دمعة • لاتحزن اعله الفات ولاخلكك يظيج مرت علية ايام تنشف الريج • بهيدة وية الروح لاتگصي بيها ماتحمل اللجمات شلك عليها • بالليل افز فزات وتتراجف اعضاي لن الوكت بالليل مشابك وياية • الرد وباليل افز فزات وبراسي املش والدهر بس وياي يبني ويفلش • شنهو التريدة الروح شنهو التعافة لا هي تريد الموت لا هي الترافة • لا تشل ببرة وخيط شله كلبي بسيم خافن رجيج الخيط ويكطعه الضيم • الرد موخيط حتى السيم مايشل گلبك ضيمك كبر يفلان ويزيحة ربك • هم الليالي اتعود ونكعد ببغداد ونتلاكة وي الاحباب ونشكي من البعاد • روحي بتوالي الليل تنشدني عنك گتلهه راح انساه گالتلي فنك • لاتنخة هذا وذاك انة ارد اوصيك شو محترك بالماي جابيش اطفيك • گالولي بسك عاد رد لأهلك ردود گتلهم انة وياه بالرمش مشدود • البدوي من يجوع هم ياكل الموز؟ يشوي شوي بنار وبلهب تموز • والحضري بالله اشلون يلبس عكاله يطمس طمس براس صيحوله خاله • كاكه ارد اصير اليوم ورد احجي كردي خاف احجي بلمكلوب وتسمعه هندي • العربي يشرب جاي بلحر فلك طر حسباله شرب الجاي غيمه وتمطر • حلفه وصريم وشوك والتف يعاكَول فشلني رجلي صخام سارح بالصخول • يل كاصد الحي ذاك بلجن تمرنه الكَعده حلوه وياك بلكَهوه شمنه • مر بينه شنهو يصير من تمر خايب مسموم انا بفركاك مامش حبايب • زيدي بدلالج علي استاهل اني هواي ياريت شكلج حلو جنج مرة بباي اتمنة روحي شموع وتحظر ابعيدك وتكتب على الكيك احبك واريدك كون انكلب صاروخ واشلع سكًفكم وانزل بنص البيت وأصرخ احبكم ما عندي للحب باب صدك قفلته بلكون احب اثنين بس الله وانت ياحلو يادلوع يلي نورك شموع لاتمشي جوا الشمس اخاف عليك تموع حبك مرض بالروح وبدمي يسري ... غيرك فلاحبيت بس الله يدري الحب عذاب فى قلوب الشباب الحب نبات فى قلوب البنات الحب اسطورة فى قلوب المكسورة انهجم بيت العين اشكد وكيحـــه كل ما تشوف حليو تكلي صيحه حـط باللبن تيــزاب مجبـور أشربـه بس لا أشوفك يوم تمشي وي غربـــه علمني عالنسيان ارد انسى ضيمـــــك وي غيري قمره اتصير بس حصتي ضيمك عبالي طيب زاد واعطيتك اعيون تالي توج النار ويا اليكرهـــون اوقف يبعد الروح اوياك الحســـاب تسَافر أو جرحي اينوح ليهسى ماطاب ارد اخذ الزنكين وسبلت اخلي وشيكضي العمر يافلان عالاله كلي الكلب بجفاك فاض من العيون مو حب طبيعي اهواك بيك انه مجنون تدري الزعل وياك شيسوي بيه احس السما ويا الكاع طبكن عليه نمطر محبة وشوك وطيبة ومحنه و عز وكرم واحسان جي طبع اهلنه عمري الخلص زينات صرت انا شينه حته النحبه اليوم يضحـك عليـنه يا ريت الزمن ينعاد و نرجع حبايب افتركنةوحنةصغاروهسةانا شايب افرش حزن بجفاك واتغطا بهموم وتوسد الاهات والايم يلوم شنهو الدهر وتلوج منة وتهم بية مرة علة مرة امرار باليسرة الاوية الاخوة بالشدات تتحزم حزام واخوتي وكت الضيم تتغطى وتنام عشرت عمر ياكمر تنتهي ليش بساع حبج سكن بل عقل يفتر على كلساع يادنيه بس وياي دكاتج ارداف ماهمني شتسوين ماعندج انصاف هذا العراقي يحب كلمن يحبه وابن الوطن هاليوم وسفة اليسبه اكعد ابنص الليل وابراسي املش والدهر بس اوياي ابني ويفلش ليش الحلو محبوب من دون أصدقائه لو كتل عشرة بيوم يطلع براءه غالي بغلاة العين و شوية اكثر من تبعد بممشاك گلبي يتفطر خلني اشتعل يهواي بس انته تسلم وحته العذاب وياك يحله ابجنهم خليني كربك دوم اروه من اشوفك وانت النظر للعين واشلون اعوفك اخ اشكثر على الاخ متعوده هالروح حته بفرح نوبات من تطرب تنوح صدكني ارد انساك بس ماني كادر فراكك يدمر الروح ويكسر الخاطر ليش من افك الباب حس لا هلا اتصيح وانه الصحت حياك من هبت الريح تسئلني كل الناس عن امنياتي اتمنه بس وياك تخلص حياتي الدهر بس وياي شد الحرابه من عكب خمس قصور هسه بخرابه لاتصفن الدنياك لاتصفن الهه تسهل ترة الصعبات من تحزبلهه عودت عيني عليك وتريد اعوفك مجدي وادك بالباب بس كون اشوفك كون اني نجم بليل وانطر واتاني تطلعلي بالشباك وانزلك اني شتله بوسط هالروح حبك زرعته كل ضنك انا انساك مخبل انت شكراً لان رديت تسلم يسالم مو مشكلة العصفور كون انت سالم شنو هالجمال البيك خبرنا عنه شايل جمال الكون شمخلي النه الخوة خوة روح واكثر واشد حيل وللعونة اهب بساع لو حملك ايميل الخوة خوة شلون ما ردت اخوتي خيّك لظل للدوم ولحد موتي يادنيه ليش وياي عثره على عثره من الصغر لليوم وبگلبي حسره الساتر الله انگول هالدنيه گشره بيه نعيش ابضيم وآخرهة حفره مسايس تره دنياك شد ورخاوه والمو الك مقسوم ما يجي بخاوه ما نمت ربع الليل نشدوا ألمخده لأن حلمت بهواي خدي عله خده اليون تالي الليل لا بد عله اسباب لو دهر موجر بيه لو ذاچر أحباب هواي أريد هواي هواي أريده ما كوم آنا مناه ألا أيدي بيده آي والعرش واللوح والبلعته الحوت نارك بلب أحشاي تلتهب للموت مو كلشي نتمناه يوكع بدينه أحنه السفن والريح تلعب علينه يالتنشد على الروح خل روحي خلهة شبعت قهر وهموم والوكت ذلهة لا يغرك الفانوس وتغرك اللمعة تالي تفتحة اتشوف ابطنه شمعة ماعندي للحب باب صدك شلعته بالدنيه ماحبيت بس انت وانت من اكعد انه وياك بس ارمش اشتاك جا شنهو بيه يصير لو صار الفراك عام انتظرتك عام يلجنت يمي مرني ابحلم يهواي شاركني همي لا تشكي هم للناس ولا تشكي حيره محد يصيح احااه من جرح غيره اكنس طريق الشوك برموش العيون وبدمعي ارش الكاع لمن تمرون الخوه للشدات تتحزم احزام واخواني وكت الضيج تتغطه وتنام من كثر مامشتاك الكم يغياب واكف ونطرك دوم يم عتبة الباب دك دكتين رداف كلبي وسكت ليش ناس بغميج تفوج واني اغرك بكيش اسمر وسيع العين والحاجب اهلال بس انت يالمحبوب بيك اضرب امثال ابشر يصاح وگول عدني من اخوتك گلبي انتفض وياك من سمع صوتك لاتهتم على الراح وي همك الراح والعالي مو بالطول بالصبر ينلاح هم شفت واحد راح وي روحة جناز كل هذا صار وياي بفراك العزاز ازرعت ورد الطيب وسكيته دمي تالي انكلب عاكول جا شنهو ذنبي هم شفت هم لاكيت عدهم شهامه مثل العراقي يصير يفديله هامه الخوه بس وياك تنحسب خوه من راسك الرجليك تنكط مروه كل ما أريد أنساك بسمك يصيحون يتحرك الدلال وتهل العيون بالحلم شفتك طيف كحلت العيون نايم وأفكر بيك من أكعد أشلون كلبي ارد اكصه ابموس واكطع وريده يبجي عله ابن الناس شنهو اليريده حبــك هجــم عالروح ياربــي ستار مثـل هجمـه يبنوهــا اثنين يونس وهوار اني وحبيبي طيف مابين العيون يمي واكول ابعيد لو يبعد اشلون؟؟ لا تجرح اليهواك حكم ضميرك صدكني يالمحبوب ما عندي غيرك هاك القلب والعين وتبقالي بس عين، وهم بعد من تحتاج اكسمها نصين أرد أسألك يفلان إحچي بصراحة الفارگ الأحباب هم يلكه راحة اصرخ والم الناس واجمع عمامي من عندي كلبي انباك وانت الحرامي من كلشي اغار عليك ويغثني كلشي كسر بجمع ماريد وي غيري تمشي صدگني الك حنيت واليحن بلوه مابيه حيل انساك چاهي گوه • اذا دار بيك الزمن ازرع طماطة وازرع بصفها خيار واشبع زلاطة روحي شكثر تهواك وشكد تهم بيك سعفة وتهزهه الريح من يمر طاريك امشي وارد اردود واذكر هواكم كون برصاصة يموت كلمن نساكم كون القلب تركيب تنزعه وتنام وتغفالك اسبوعين من ضيم الايام ابجي واذب حسرات عالفاركوني مدري التهو بالغير مدري نسوني الصحبة صحبة موت لا تظن اعوفك لو تدري انا شلون مشتاق اشوفك نامت قلوب الناس بس قلبي كاعد والضغط من فركاك كلساعه صاعد ياصاح انته الوفه وقلبك مواسم طيب ولو جار بينه الوقت مثلك منين انجيب حبك حبيب الروح حبك سباني نايم واسولف بيك مدري شجاني تبجي عليج العين موبس دمع دم من فركتج لليوم هم باثرهم من فركتج لليوم ماشفت الافراح ولاضحك سني بيوم ولاكلبي ارتاح ابجي وتكلي الناس جرحت الاخدود كافي البجي ميفيد ولفك فله ايعود يالتبجي عالعافوك ودموعك اتخط محد يكلك ليش لو روحك اتنط صعبه النظيف بهل الوكت والزين ما ينعف والوســـخ لو تغسله بتيزاب ما ينظف • اسحك علـــــــــــــــه الدلال بلجنه يسلاك واخلص واخلص الروح من ونهه بجفاك • خالي وخوش خال وبالثريد يفيد يتعنى العزايم لو تصير بعيد يمد ثنين اديه وما يمد فد ايد ويتونس لو جابو روبه • حبك مرض بالروح وبدمي يسري غيرك فلا حبيت بس الله يدري • كلما تمر ذكراك أرجع البيتك . الوطن لاتنسوه جانت وصيتك . الوطن ماننساه ولاننسه أسمنه . لابد يجينه يوم نحقق حلمنه . • مدري الوطن حزنان مدري الدنيه حزنانه اشو ما شاف العراق الخير من ذوله جيرانه كلها اتريد منه ومحد انطـاه ولافديوم صاح اشكثر عـانه كضينه العمر وياه كله احـروب الشعب ضمه ابكلبه وهوه شريـانه اريد احجي واحاجي الكـــون بغداد الجميله الورده ذبــلانه هانت ياوطن يا ابو النــهرين تصفه وترد افراح دنيــانه افرح ياوطن وشبع مسـرات تضل تاج العرب وانته سلـطانه • آه يلكلت عطشان هاك اخذ العيون وشرب سواد العين حد الشبع كون • ارد اسال العشاك واهل الهوه هم ليش اليجرحه هواه مايطلع الدم • اهلا وسهلا بيك واكثر بالوياك والكلب كبل العين فر وتلكاك • اهلا وسهلا بيك وكت التحب مر وبروحي اتلكاك وانثرلك الدر • الارض طير انته وانا الكاع لابد تحط يوم ولابد تجي تعبان من فرة الحوم • الطائر طير انه وانت الكاع لا ما احطن حت لو اجي تعبان بالماي اغطن • الارض هم شفت طيرا طار ماحط على الكاع ليش الله من ينطيك تتكبر بساع • للبوسه احط جناح تتحدى الحدود وتوصل يم الاحباب وتنحط علخدود • غالي وتظل عل بال ونته الأعز دوم كل كعده ساعة وياك تنعد بألف يوم • يا كلبي بس بالليل خل روحي تنام ومن الصبح للضيم أتحزم أحزام • كلبي صبح فرهود ولكل تعت بيه وبالباب الف ديان حرت آلمن اطيه • ريت الكلب ياهواي ينطر وراويك جا كلت عفيه عليك دم ولحم بيك • ريت الكلب بي باب ينطر تشوفه ولو شفت غيرك بيه حك من تعوفه • ارد اسئل الصباغ هم تصبغ اكلوب لصبغ دليلي عليك واحزن فرد نوب • من كلبي خذلك نار جمل جهنم والما يعرف ينوح مني يتعلم • صح وصدك عطاب تشتم الخشوم من كلبي تطلع نار موش من الهدوم • وج ونطفه الدلال يوم الضعن ساك حنظل ولوجن بيه مر يوم الفراك • آنا لك يالدلال أفرغ وجويك لسه تحن لساه لا مروا عليك • الدنيه ضاجت وضاج بعيوني الزمان ومن ذكرتك صار بكليبي المجان • كلبي من أمس واليوم مالي أهد بيه مدري انشد الجيران لو صوت عليه • حيل أفرح أبملكاك يل مكبلك عيد وصار الكلب بجفاك تنور اجاويد • يمته الأحبها اليوم تتلاكه وياي أخبرها كلبي يذوب وبطرة جلاي • حس كلبي حس ونحاس ونصدع ونعاب آس ولك أسمع صوت بديار الاحباب • أيد ارتجي عل كاع ويد بدليلي أنهض مابياش وكفه عل حيلي • مر الدهر لا صار اصبر وباريه بلشت كلبي وياه وأدريبه ياذيه • حسره لك بالدلال ظلت لماموت مادرت حكها الناس أصوابي بسكوت • • إعيونك انته القوس و إرموشك سهام ... كلمن يصد ترميه ، و تحكمه إعدام • صح شيّبت يا ناس، بس روحي خضرة ... كل ذنب ما سويت ، عاشگلي سمرة من ها الدرب مريت كله علموده ... بس ارد اشوف هواي و احظه بوجوده مساء الخير يلي من العسل اصفه ... لوبيدي علاج الناس اخلي شوفتك وصفه اكتب جوابي عليك معروفه الاسباب ... لو صرنه متحدين جرح الوطن طاب سن الضحك وياك لازم اشلعه كلبي الرف عليك من صدري اطلعه ما ظل فلس بالجيب واتصل بيكم.... ولا فرس يم الباب واركب وجيكم وين البخت يفلان وتكلي مبخوت لو اشتغل دفان هم محد يموت تجمع تلم افلوس اشكد رايد تعيش الجفن مابيه جيب مثل الدشاديش القلب قال أحاه ! كتله وجعـــــتين منهو الاجى أوعزاك من طكك البين يالردت عني اتروح خليلي صبرين واحد يصبر الروح والثاني للعـــين ضايجه انتي اشبيج راح امشي عنج ..... والله منحط مكياج انه احلى منج طيب واظل وياك مخلص للوداع .... هم انته مثلي اتصير لو تنكر بساع يا سالي هاج الروح خليها يمج..... اي والله والعباس ما الكه منج الكمر يضوي بالليل والصبح غايب بس شامتك يفلان من العجايب فرفوري خد اهواي والشامه كهرب والزلف حارس ليل وعيونه اصعب لجرحك تريد اخياط تنشدني انه... گلبي خاص لچمات ضل بس مچانه شنهو العشر سنتات شنهو الرسالة ..؟؟ خلي الرصيد يروح .. دمي ابداله شمالچ ييمه و ليش جبتيني للضيم ... شو بس علي دنياي تمطر بلا غيم؟ غصبن عليه الروح جابتني اشوفك ... چثرلهه بلصدمات ، بلچن تعوفك صاير طبع بهواي من اگعد يگوم ... اسود گلب وياي ، أبيض بالهدوم شحجي وتريد الناس من عندي أحجي دمعتي إبطرف العين بس أحجي أبجي أقبل صباح اليوم ابدنيتي هـــاي شلت الردا أوفزيت لن عيني بهواي يمكن علي زعلان واتمنى زعلان اهون زعل كل يوم من لحظه نسيان تضحك عليه ادريك بس حاله بيه اضحك واصير وياك واضحك عليه لاتظن واحد يوم غيرك عشكته ولو يوم احب اثنين هم انته وانته لو فد سباق يصير ياهو اجمل الناس ونذب عليك تراب هم تاخذ الكاس اعيونه سود اكبار واثــرن بيــه شلَي سبع اضلوع وجماله ايدي شنو انت واهتم بيك واحسبلك احساب لاتضن ابني عليك يل اســاسك اتراب لاتضن حي وانساك يا اغلى نـــاسي كل البشر عل كاع وانت على راسي غالي وعزيز الكرت وافلوسه كلفه اذكرني بعشر سنتات واحسبه سلفه الكارت والسنتات عذبن حالي خل أگطع المسكول لا يفتحه الغالي ليش النحبه اهواي يكثر دلاله ويبخل علينا اشبيه حتى برساله عذبك هذا البيت فوت ادفر الباب واكمل الضحكات لعيون الاحباب خابرت ست مرات طلعتلي امك حرمت من هاليوم هيهات احبك اريد اسئل العشاك عنج ياحلوه سمره وسيعة عين وللكلب سلوه الله كريم تهون ماتضل هيجي اليضحك على اليبجون هم هو يبجي لاتعتب على الناس عاتب نصيبك امكدر ومكتوب كل مايصيبك اني وحبيبي طير ما بين العيون يمي واكول بعيدلوتبعد شلون عيوني خوش عيون وعماهن هواي ماوجد الماعون بي لبن لوماي العرب بس رمضان اتصومه كل عام كل عمري صمته عليك من دون الاسلام سلم يابعد الروح وحيل ارفع ايدك مااريد كل الناس بس انت اريدك • لاتهتم على الراح وليهمك الراح والعالي مو بالطول بالصبر ينلاح • وينك يبعد الروح خليني أشوفك لوتمطرعلي سجيل لتظن اعوفك • عيدي أشوفك يوم من يهل كمرك واشعل العشك البيك وبحبي اوجرك • اعلن وصيح بصوت حبك كتلني صدك كلبي يموت من تفاركني • انته وسط الروح ساكن حبيبي وكت التهل جروح تصبح طبيبي • لو الواشي كال أنساك كله انت اعمه واخذه دك كلات واكسرله خشمه • كيمر عسل مخلوط شلون الله سواك للصبح يعجن بيك لمن صرت صاك • بلكلب ماناسيك صوره الك راسم حب من عهد ردام مو حب حواسم • كل لحظه احسن بيك جنك نبض دم تسري انت بالشريان وبكلبي تلتم • حبك سكن بلروح والتف عليه ومن بسمك يادون تفقد وعيها • حفرت اسمك على التابوت ضل محتار دفاني على كبري كتبت حروف غيرك مااحب ثاني • تعبانه هاي الروح من كثر فركاك حزنانه تبجي عليك فرحته ملكاك • اتمنى حبيبي يصير بلحمزه دنكه وبحجة الزوار كل ساعه اشبكه • شتله وبوسط الروح حبك زرعته كل همك انه انساك مخبل انته • لملم غراضه وشال كلبي ولحكته من كلي رايح ليك عفته وعذرته هاك استكانة جاي أشرب عوافــي أو دزيته لك مخصوص يامايه صافي • رش الدرب تيــزاب حافي أعتـني لـك جا شـلي بالرجليـن الما تجي لــــك • لو ترش مو تيــزاب لو تزرع ألغــام اللحم خلـه إيروح أوصلـــك إعظـام • كل ما يجن الليل أذكر وفــــاكم واذكر محاجي الطيب وابجي أبرهاكم • ويا النجم سهران وايدي أعلى خــدي الليل أوظلام الليل شو كلها ضـــدي • وحدي ابنص الليل بس حيرتي أوياي أبجي أعلى وقت الراح واتنطر الجاي • إشما تقول الناس عندي أنته لول سو كلشي بالدلال يالحلو مخـول • يالتون تالي الليل سمعني حسك لولا القلت والقال لعبر وونسك • شحجي وتريد الناس من عندي أحجـي دمعتي إبطرف العين بس أحجي أبجـي • للخوه ماقضيت شي ماقضيته حتى الصخر ياناس وتوسديته • انت العطش والماي وانت المشوفـه ورسمج وحق عيناج بالكاس اشوفه • أرد انشدك وارجوك صارحني ياهواي اتذكرني لوغصيت من تشرب المــاي • نارك يخايب ماي مومثل نـــاري اومن يطري بيه الشوك يحترق جاري • هم حلو .. وهم إزغيــر .. هم أزرك عيون بس بيه طبع مو زين من يوعد إيخــــون • بالك تقول الاه ياخويا بـــالك كل التكوله ايصير روحي ابدالك • مبخوت أضل للشيب يافلان أذكـرك أوينكرني نور العين من كون أنكرك • سبحانه من سـواك نص وجهك إعيــون إزغيــر سبيــت الناس من تكبر شلون • بيدي أوقرضها الفار فجت عباتي كل هذا ماطخيت وامشي ابرهاتي • أتمنى كون أيصير لحدي أويا لحدك أو من يطلع الدفان أقعد وقعـــدك • بيدك ضيعت ذيج الليـــالي وبلحظه ما أجى أبعينك دلالي • يسألني البطران حالك إشلونــه الغاضب الله إعليه هم ينشدوونـه • عبالي طيب زاد واعطيتك اعيون تالي توج النار ويا اليكرهـــون • هاك أبره , هاك الخيط خويـه أرد أكلفـك أمسرد الدلال شــله إعلى عـرفــــك • هـاك أبرتك. .و الخيـط خويــه إمش عنــي لو بـيـــه أشل إجروح .. جان أشل هذنــي • علمني عالنسيان ارد انسى ضيمـــــك وي غيري كمره اتصير بس حصتي ضيمك • سبحان من خلاك تقسي ابغرامك جانت اتداوي اجروح رقة كلامك • اوقف يبعد الروح اوياك الحســـاب سَافر أو جرحي اينوح ليهسه ماطاب • هامسه أوهامصباح باجر يشيلـون اورجليه شالت طيب من دمع العيون • الدنيا بس وياي شـدت عـــداوه ولا واحد إمن الناس لجروحي داوه • ارد انشد الصباغ هم يصبغ اكــلوب اصبغ دليلي اعليك واحزن فرد نوب • حـط باللبن تيــزاب مجبـور أشربـه بس لا أشوفك يوم تمشي وي غربـــه • يسألني البطران ليش وجهك اصفر • مايدري على المحبوب قلبي تفطر • اصبر وشد الجروح وأنزف فلا اطيح . حتى الوطن ليضيع وي عاصف الريح • أكعد يبعد الروح شوف أشجرالي مدري ابجي علبغداد مدري أعله حالي • يردونك الشمات غارك بالهموم صدكني مرعوبين من صحوة اليوم • ألمن بعد أشكيه همي ومصابي . وألي أشتكيله صار هو عذابي . • ريبه وكثر وهواس والحيره زادت . بين الكلت والكال وادمنه تاهت • يمته حزنه يزول وتزول الهموم . ويمته كمرنه أيعود ونزفله النجوم • حنيت انا لبغداد ولشوفة الناس واللي ما يحب بغداد ما عنده احساس • الغربة ما تنراد بس والله مجبور عمرك شفت عدل يسكن بالكبور • راح وبعد هيهات يرجع علينه سواله صحبه اهناك واحنه انسينه • تاج وتظل عالراس يامعدن الطيب لو غبت عن العين عن بالي متغيب • غالي وتظل محبوب حد النهايه والزرع بيش ايعيش من يجف مايه • احبك واضل اهواك لاخر نفس بيه. .ولوشفتك باخر نفس روحي ترد ليه • متعجب من تگول ما نمت چم يوم. .من عمري سبع سنين ماضكت كل نوم • مهما تعذب الروح أصبر واحبك وأزحف زحف مصيوب وأمشي أعله دربك • ليل ورمي وطلقات والشرطه هوسه لزموني گالوا وين گلت ارد ابوسه • تمثال الك منصوب مابين العيون نافوره منه وبيه من دمع العيون • چتفت روحي چتاف كل ضني انساك من روحي تطلع روح وتگلي اهواك • شما تبتعد هيهات تبعد عليه اتنفسك كل يوم يعني انته بيه • كونك تجيني بطيف وتمر عليه حتى الفراش ايگوم ياخذ تحيه • بنص رحه حطني البين ضل يطحن سنين ورد على باجي الروح دكه بهواوين • موش على كلمن شال انه ابجي يحسين ابجي على اهل الدار الوافوني بالزين • مجبورة بيك العين وانتة بوسطهه وصورتك بالدلال بس هيه احطهه • بالك تظن وتروح وتنزل على غطاي وبحجت البردان وتتشابك ياي • كل ساعة أون عليك كل ساعة مرتين مثل الحسن لوصاح وينك يالحسين؟؟؟ • اسود قميـصچ حيـل والچنطـه سـوده هذا حـزن معهـود لـو هـاذي مـوده • هم حلو هـم زغيـر هـم أزرك عيـون بس بيه طبع يا ناس مـن يوعـد يخـون • سليمـة بـت سلمـان سـايـل كحـلـه دينـار الـك بخشيـش بـس تغمـزلـه • لأ لله لـدز طـروش وأشكـي الهضايـم و أگلهم صيحوا حيل خـوف انـه نايـم • سود العيـون إكبـار والحلـك محبـس ويستـره رب الكـون لـو دلـع يلبـس • من الحزام وفـوك مرخـوص الاسمـر خاف الطمـع يوزيـك وإحنـة نتگشمـر • بسـك تـون بهـواي حـالـك تغـيـر عدي خـوات هـواي طـب وتخير • متعجبـة النسـوان تطلـك فـرد يــوم طلوگي بالساعات كل ساعـة أذب تـوم • متعجبـة النسـوان تجيبـهـة سسـتـر وأنـة 12 دكتـور والفـراشـة تفـتـر • أطلك وأعـت بـالگاع مثـل المعسـرة حسبالي عشـرة فـروخ تاليهـا حسـره • ظـل إبچي طـول الليـل أبـداَ مهـزك كون إنتـة ابـن هـواي چان شمعزتـك • من جبت طاري هـواي تيهـت شـوري خـدرت بالفانـوس حسبالـي قــوري • إنهجـم بيـت العـيـن شگد وگيـحـة كـل مـا يمـر الحلـو تگلـي صيحـه • كـدرت حلـك هـواي المحبـس أكبـر خافـن يغـص بالمـاي يالكاظـم أستـر • أخ ياولـفـي مــن إلــي حچيـتـه حتـه السـمچ بـمـاي كــرز بتيـتـه • صب دمعـي عـالگاع وحـرك دغلـه والبـصـره والعشـارهـي ونخلـهـة • مانمـت نـص الليـل حلـف المـخـده والدمـع صايـر سيـل للركبـة حــدة • جبراني مـو جيـران جيرانـي جيـران عدهـم بنـات أثنيـن وأحلاهـن إيمـان • شلونك شلون الـدار وشلـون الفـروخ لبسوا ثياب العيـد لـو بعدهـم صلـوخ؟ • كـل السنـون عظـام بـس سنه ليلـو جاكٌم وسيـع العيـن عـن دربـه ميلـو • كل السنـون عظـام بـس سنـه فضـه زبـد ويـذوب هـواي ومنييـن أگضـه • بسيـان أذبهـا الـروح وأسحـق عليهـا ما حـوت الطيبـيـن چا شـلـي بيـهـا • مرخص علـى عضـاي تسحـك بيهـه بس لا تدوس الـروح چيـف انـت بيـه • ياحلـوه مـن تمشيـن عدلـي بگذلــتچ الشرطـة والظـبـاط كلـهـا بخـدمـتچ • أأرد أنشد العشـاك مـن مثلـي مشتـاك غافـي هـواي وأبچي مــن الـفـراك • حلوه وحلكهه زغير مـا تكـدر تبـوس بين الرمـش والعيـن خلتنـي محبـوس • مو من طبع الروح تشكـي مـن الهمـوم لكـن سهـم دنيـاي هالمـرة مسـمـوم • من سهم كمت تلـوج لـن هـو مسمـوم مطرت عليه سهام مـن زغـري لليـوم • فـرحـان الــعگروك صايـدلـه بگة لو يدري بيه التمسـاح چان حـلگة شگة • الدهرصايـرجـاي والدنـيـا قــوري ليش الي يحب هـواي ينضـرب بـوري

_________________
"اللهم أزرعنـي في قلـوب الناس كالنبتـة الصـالحة
اللهم أجعلنـي للنـاس قــدوة ولا تجعلنـي للنـاس عبــرة




مع تحياتي حســــــــــــين لطـــــــــــــيـف
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://baghdaddaralsalam.3arabiyate.net
 

الف دارمي

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

 مواضيع مماثلة

-
» دارمي منوع

صلاحيات هذا المنتدى:لاتستطيع الرد على المواضيع في هذا المنتدى
منتديات بغداد دار السلام الاجمل والاحلى :: •·.·´¯`·.·•قسم الشعر العربي •·.·´¯`·.·• :: الدارمي والابوذيات-